今次呢個貪小便宜嘅故事係我嘅朋友話俾我知嘅，都係好耐好耐之前嘅事啦。
話説公司有位好貪小便宜嘅阿叔，以下簡稱大叔K。平時啲人都去攞下公司啲文具返屋企用，但係呢位阿叔「善用資源」到一個令人詫異嘅地步。
Level 1：用盡一分一秒
大叔K喺公司翻翻下工， 周不時做做下嘢就無啦啦落下公園散步。問佢點解，佢話唔想浪費時間俾公司，用公司時間散下步好似著數咗。我聽完朋友講心諗：咁樣嘅方法都有！如果做唔曬啲嘢要OT咪仲衰！但係唔係喎，如果OT有得補水，咁佢咪賺咗！真係估佢唔到！
（補充返：朋友公司OT係無補水嘅~）
Level 2：「惜食係美德」
公司以前係包埋員工午餐嘅。每次訂飯，大叔K就會一個人訂3至4盒飯，有時又嗌下幾隻炸雞髀。送到嚟公司後就Pack好帶翻屋企食，省翻啲買餸錢。唔知佢屋企人知唔知道呢？
另外呢件事就純屬佢地同事之間自己推測喇。有時同事檯面會放下啲朱古力啊、糖啊一啲小零食，但係每到第二日早上，檯面上嘅小零食就會唔見咗，而最大的嫌疑人就係最後一個離開公司嘅呢位大叔K (因為大叔K負責鎖門)
Level 3：離奇失蹤事件
朱古力消失咗呢件事真係無從考究，但係除咗朱古力唔見咗之外，都仲有唔少公司嘢「離奇失蹤」，其中一個案發現場就係男廁！根據朋友嘅説法，清潔姐姐會係同事放工後放一條廁紙係廁所，亦會refill公司洗手液。但係每朝翻到公司都發現琴晚放喺男廁一條12卷嘅廁紙竟然得翻6卷！！！洗手液亦會得翻半枝！！大叔K係公司最後一個走嘅同事，到底佢有咩神秘魔法，可以一夜之間變走6卷廁紙同半樽洗手液？定係佢有咩不可告人的秘密，以致需要幾個鐘頭之内可以用曬半條紙巾同半枝洗手液呢？真係估佢唔到！
延伸閲讀： 探討CSR在香港的應用與背景
Level 4：做到咁真係得大叔K先得
朋友嘅公司係有洗衣房，裏面有洗衣機同乾衣機嘅。大叔K每次放工做完運動，就會落啲衫返公司洗，個陣公司都無曬人揦。但係有一日，當清潔姐姐朝早翻到公司嘅時候，「哎呀！有無搞錯啊！」原來佢見到有條孖煙囪掛咗喺洗衣機上面，真係嚇到清潔姐姐花容失色，等上司返到公司就話俾上司知，然後上司再report上去。唔洗半日，全公司都知道大叔K係公司洗衫同晾孖煙囪嘅事啦！聽完之後真係「哇！」咗出聲，咁大個人都係第一次聽到有人貪到咁盡！
不過成件事最慘嘅唔係大叔K，亦唔係比佢攞咗零食嘅同事，最慘嘅係清潔姐姐！佢係唯一一個見到大叔K孖煙囪嘅職員，平時又要幫佢執手尾，補翻啲廁紙啊、洗手液啊！真係辛苦曬！
MomendayX：香港本地社企 x 可持續發展目標搜尋器
MomendayX自2021年開始一直主動發掘香港社會企業(社企)，經香港社創基金支持下成立「本地社企搜尋器」，助企業、機構和普羅大眾認識更多幫助社會並且達到可持續發展(SDGs)目標的香港社企。
Comments